Hawa mein dhuaan | What air pollution means for kids?
Ek fact mein aapka batata hoon jo aapka pakka nahin pata hoga: ke bachey badon se zyada saans lete hai. Agar aapka bacha 6 saal ka hai to woh aapse do guna hawa har roz apni lungs mein le raha hai. Agar bacha 1 saal se chota hai to teen guna hawa uski lungs mein jaa rahi hai. Yeh mein bol raha, yeh proven research bolti hai.
Aap ek curious parent hai aur agle paanch mein hum bachon aur pollution ke baare mein baat karenge.
Agar aap aise parent hai jisko lagta hia ke kissi cheez ke baare mein baat nahin karenge to woh aapko affect nahin karegi to aap abhi sun na chor sakte hai.
Aise ek parent se meri baat hui. Mein koshish kar raha tha ke meri beti ke school mein air purifiers lagein to mein parents se baat kar raha tha/ video share kar raha tha taaki bachon pe air pollution ka kya impact hota hai, yeh samjha sakoon. To ek parent ne mujhe reply kiya - aap mujhe yeh sab baatein mat batao, mere father ki death cancer se hui thi.
I was shocked. Meri hamdardi hai poori lekin yeh parent dekh chuka hai ke cancer kya kar sakta hai. Aur suljhane ki jagah ulti direction mein bhaag raha hai.
Mujhe air pollution ke bachon pe affects ke baare mein tab pata chala jab meri family mein cancer hua. To maine research ki aur ek kitaab padi called: emperor of all maladies. a biography of cancer. Usmein ek bahut hi interesting cheez thi ke 1700’s mein London mein child labour allowed tha. Chote bachon ko 4 saal ki umar ke baad kaam karna legally allowed tha. To chote bache chimneys clean karne ke kaam mein aate the. St Bartholmew’s Hospital mein ek surgeon Percivall Pott ne notice kiya ke cancer badd raha hai. Aur thoda dhyaan dene pe notice kiya ke yeh chimney boys mein hi ho raha hai khali. Technology advanced nahin thi prove karne ke liye kuch lekin unhone paper publish kiya ke yeh ho raha hai us mitti ki wajah se jo chimneys mein woh saaf kar rahe hai and he named it soot cancer.
Aise diseases ko morbis artificum kehte hai. Matlab man made diseases. Yeh isiliye imp tha kyonki pehle baar yeh identify hua tha ke kissi bahar ki cheez se body ke ander cancer hota hai. Yeh imp isliye hai kyonki agar bahar ki cheez se hota hai, man made hai to matlab roka ja sakta hai.
Roka ja sakta hai lekin rukega nahin. Agar politicians ko rokna hota to abhi tak Delhi mein pollution nahin hota.
Aur rukega tab jab parents ko lage ga ke pollution se mere ko aur mere bachon ko nuksaan hai.
Bahut parents ko lagta hai ke air pollution se fark nahin padta. Maine kaafi socha ke aisa kyon hai, phir mujhe realise hua ke air pollution jo hai woh water pollution se bahut different hai. Agar aapne ganda paani piya to aapka pet fat se kharaab ho jaata hai. Isliye hum sab ne ghar mein water purifier laga liya hai. Lekin kharaab hawa se agle din kuch nahin hota, bass thode saalon mein asthama, cancer, heart attack hota hai. Isliye humne abhi bhi apne gharon mein air purifiers nahin lagaye hai. Kyonki aaj ki zinadagi pe asar nahin pad raha so our mind thinks ke ok hai.
To bache par pollution ka asar zyada kyon hota hai
- Pehla yeh ke bache 3 guna zyada hawa humse lete hai. Matlab agar ek adult ke liye polluted vatavaran mein rehna 10 cigaratte phoonke ki karah hai to ek chote bache ke liye woh 30 cigarette ki tarah hai. Ek chota bacha - 30 cigarette.
- Doosra yeh ke unki lungs ki inner lining abhi bhi develop ho rahi hoti hai, isliye unme pollutants ka fasna aasaan hai
- Teesra unka airways jahan se hawa ander jaati hai chota hota hai isliye wahan blockage hona pollutant ke karan easier hai
- Chautha unka immune system abhi develop nahin hua hota which means ke bimaar hona zyada asaan hai
- Unki body developing hai, choti hai aur hawa humse woh zyada lete hai. Isliye air pollution ka impact unpe zyada hai. Air pollution ka impact actually birth hone se pehle hi pregnant women par shuru ho jaata hai jiske karan kam weight waale bache paida hote hai.
Also air pollution compound karta hai. Matlab kharaab paani ke karan agar hamara pet kharab hua to teen din ke baad theek ho gaya, kahani khatam. Lekin ek baar jo pollution ka particle hamare bache ki lungs ke ander chala gaya, woh kabhi bahar nahin aayega. Wahin rahega aur uske upar aur particle aate jayenge.
Aur aisa nahin hai ke bahar ki hawa mein hi pollution hai. Aur humne khidkiyaan band kar di to hum safe ho gaye. Statistics say that indoor air pollution kayi baar bahar se bhi zyada hota hai, kyonki particles ander trapped hai aur pankha usko hila raha hai, cooking ho rahi hai, agarbatti jal rahi hai. Aur sab ghar ke ander hi hai.
Isliye jo karna hai woh parents ko hi karna hai. Pollution ek bada reason tha jiske karan mein aur meri family Gurgaon se 5 saal pehle Mumbai move ho gaye.
Agar aap aise jagah reh sakte hai jahan air pollution kam hai to bilkul rahiye. Yeh hi best raasta hai. Lekin sab log nahin reh sakte - to hum kya kar sakte hai
- Pehla yeh ke covid ka karan jo mask hume mila hai woh pehan sakte hai. Specially 2 wheelers par
- Apne ghar ke AC mein additional filter laga sakte hai jo ki amazon pe milta hai
- School mein aur Ghar ke har room mein air purifier laga sakte hai. Mere ghar mein 4 air purifier hai jo ke hamesha chalte rehte hai. In chaaron ka cost saal ki lambi chuti se kam hai. Agar aap itne nahin lagana chahate to at least bedroom mein laga sakte hai
- Aur jo ghar ya school main road ke pass hote hai unmein 40% air pollution zyada hota hai. To ho sake to main roads se thoda door reh sakte hai.
Duniya mein 1 in 10 death of children is now attibuted to air pollution. Agar shaher nahin badal sakte to choti 3-4 cheezein karke air pollution ka prabhav apne bache par hum kam kar sakte hai. Aur yeh hum karna hi hai.
Aap ek curious parent hai. Aapne mere saath apne bachon ke liye 5 min bitaye iske liye mein aapka shukrguzaar hoon.
Phir milenge.
