Mobile dikhao, khana khilao

Sann 1897 mein ek Russian scienties Ivan Pavlov ne ek bahut imp research publish ki.

Unko apni research ke liye 1904 mein noble puraskaar bhi mila. Kya thi yeh research aur uska hamare bachon ko mobile dikha kar khana khilane se kya lena dena hai?

Gaur se sunenge to bahut lena dena hai. Aaj kall har bacha khana khata hai. Kyonki mobile dikhate dikhate kissi bhi bachey ko kitna bhi khana khilaya jaa sakta hai. Aur Ma, Daadi sab khush hai. Kyonki bacha bina shaitani kiye, bina nakhre kiye, bass khata jaa raha hai. Tandurust banega, bada jaldi hoga.

Ab ismein kya galat ho sakta hai?

Sirf ek gadbad hai. Humein apne bachey ke tann ko do dekh liya, uske liye khana khila diya. Lekin uske man ko bhool gaye. Woh tann jo dikhta hai, woh bad raha hai. Parr woh mann jo dikhta nahin hai, uska is tarah khana khilane se kya haal hua? Kya aapko pata hai humein bhookh kaise lagti haI?

Mere ek mitr jo har roz walk pe jaate hai, unhone notice kiya ke pichley 10 din se woh walk karne ke baad zyada khane lage hai. Unko pehle to samaj mein nahin aaya kyon. Bahut sochne par unko samaj aaya ke unke chalne ke raste mein nayi market khul gayi thi jismein se khane ka smell har roz aana shuru hua. Woh smell se unka zyada khane ka dil karne laga.

Jab pet khali hota hai, ya humein kahin khane ki khusboo aati hai, ya hamari aakhein kuch aisa dekhti hai jo humein swadisht lagta hai to man ko signal jaata hai ke khao. Aur khane ke vichaar hamare mann mein aate hai. Russian scientist Ivan Pavlov ki jis research ke liye unko noble prize mila uska hamare bachon ke mann se bahut tallok hai. Scientist Ivan Pavlov ne yeh research kutton pe ki.

Unhone yeh dekha ke khana khane se pehle hi kutton ke muh mein paani aata hai. Isse hum saliva kehte hai. Aur woh is baat ko vaigyaan se prove karna chah rahe the. Uske liye unhone ek choti si tube kutton ke muh mein daal di. Is test tube mein saliva ikatha hota hai. Lekin unhone jab dhayan diya to pata laga ke kutte ko khana dene waale ke footsteps sunte hi saliva aana shuru ho jaata tha.

Matlab bina khana dekhe hi unka mann kutton ko saliva banane ke liye bol deta tha. Ivan Pavlov ne phir ek aur experiment kiya: unhone ek ghanti li aur ab khana dene se kuch der pehle har roz woh ghanti bajani shuru ki. Shuru mein kuch nahin hua lekin kuch dinon mein sirf ghanti bajane par hi kutton ke moh mein saliva aane laga. Matlab kya hua?

What happened here? Yeh hua ke kutton ke mann ab train ho chuka tha, ke ghanti sunte hi humein khana milega, humein bhookh lagegi, yeh unke mann mein bas gaya. Is research ke liye Ivan Pavlov ko noble puraskar mila. Is research ko naam diya gaya 'classical conditioning'. Aur kutte ke response ko kaha gaya 'conditioned reflex'. Yehi hum apne bachon ke saath kar rahe hai.

Unko aaj hum khana khila rahe hai mobile dikha kar, cartoon dikha kar. Unke dimaag ko hum train kar rahe hai, ke jab bhi khana khana ho to unka man bole arey mujhe TV chahiye. Shayad yeh bhi ke jabb bhi woh TV dekhein unka dimaag bole khao. Bhookh lagi ho ya na lagi ho, dimaag bolega khao.

Mobile dekhte hue khane se over eating hoti hai. Hum zaroorat se zyada khate hai. Sochiye hamara bacha bada ho gaya hai, usne khane ki plate uthayi, ya chips ke packet uthaye aur TV on kar diya. Aur woh bina soche samjhe ab chabata chala gaya. Kya hoga aise bachey ke tann ko aur mann ko bada ho ke. Kitna unhealthy hoga.

Yeh mann ki training hum usmein paida kar rahe hai aaj usko mobile dikha ke aur khana khila ke. Mere ek dost ghoomne gaye the apne bete ke saath. Wahan pe unka mobile band ho gaya. To jab khana khane ke baat aayi, to unke bete ne pita se bola. Arey mobile hi nahin hai, mein khana kaise khaaoonga. Mein khana nahin kha sakta.

Mere dost ko us din pehli baar ahsaas hua ke unhone kya kar diya hai. Mann mein kya sambandh bana diya hai. Yeh sambandh todna hamare haath mein hai. Yeh hum rok sakte hai. Bahut baar khana hum bachey ko isliye khilate hai kyonki humein lagta hai ke unko bhookh lag rahi hogi. Ya humein lagta hai ke din mein teen baar to khana hi chahiye. Parantu hum sab ki bodies aur bhook different hoti hai.

Sirf hum khud hi bata sakte hai ke kitna khana hum khana chahate hai. Kab khana chahate hai. Bachey samajdaar hote hai. Unko pata hai unko kab bhookh lagti hai. Ek saal ka bacha bhi jab maa ka dhoodh pi raha hota hai to utna hi peeta hai jitna zaroorat hai. 3 saal se chote bachey khelne mein vayasth ho gaye, bhool gaye to thoda ro ke bata denge. Aap khila dena jitna woh khana chahe.

Agar aapke ghar pe abhi mobile dikha ke khana khilane ki aadat padi hui hai to ho sakta hai ke aapka pehla hafta mushkil jaye. Bacha royega kyonki usko aadat pad chuki hai. Lekin ek baar usko samaj mein aa gaya ke mobile nahin milne waala hai to rona band ho jayega.

Bacha shayad khana khane se mana kar de. Kuch nahin hota. Aap usko bola - beta hum samajte hai. Yeh aapke liye khana rakha hai, jab bhi khana ho kha sakte ho. Aapne agar aapne ek hafta nikaal diya, to bachey ka vyavahaar badar jayega. Woh zid karna chor dega aur aap safal ho jayenge. Is sab mein mein yeh nahin keh raha hoon ke mobile phone ya TV dikhana bilkul band kar dena chahiye. Yeh aaj kal ke zamane mein mushkil hai.

Lekin mobile phone ke saath khana khilana band kar dena chahiye. Jabb bhi mein kissi maa baap ko apne bachey ko mobile ke saath khana khilate hue dekhta hoon to mujhe Sholay movie ka gabbar ka dialogue yaad aata, 'basanti jab tak tumhare pair chalenge, iski saans chalegi'. Yehi hum kar rahe hai, ke jabb tak mooh chalega, to video chalega, chahe overeating ho jaaye. Sholay movie mein to Jai ko bachaane Veeru aa gaya tha, lekin yahaan pe yeh kaam aapko hi karna hai.

Mera naam Harpreet hai. Aapne mere saath apne bachon ke liye paanch min bitaye iske liye mein aapka shukrguzaar hoon.

Phir milenge.