Mummy mummy, papa papa

Mera naam Harpreet hai. Aur hum agle 5 min hum bachon ke baare mein baat karenge.

Mummy mammaaa mummy. Papa papa, papppaaaa.

Agar aapke ghar mein koi chota bacha hai to yeh shabad poora din aap sunte honge. Mere har dost jinke bache hai pareshaan hai is se. Ke yeh bachey 2 min nahin chorte hai. Bathroom chale jao to darwaze par khade ho jaate hai, mummy mummy papa papa. Aisa kyon hai aur karein to kya Kya karein. Mein aapko ek asli kahani sunata hoon jo covid ke badolat sach hui. Kyonki hum sab ghar se hi kaam kar rahe the to humne socha ke chalo paharon mein jaa ke k aam karte hai.

Humne Palampur mein, jo ki Himachal mein hai, wahaan par Earth House naam ki jagah book ki. Yeh ek mud house hai, ek choti si nadi ke baadju mein hai, baraf ke pahar dikhte hai yahan se. Par sabse zaroori yeh ke yahan tak car nahin jaati. Car ko 500m pehle rukna padta hai kyonki yeh jagah ek chargah, ek grassland ke beech mein hai. Ped pe ek jhula laga hai aur aas pass bass khuli jagah hai. Yeh jagah humnein, matlab mein, meri wife aur meri beti, humein 1 mahine ke liye book kar di. Aur apne doston ko bola aap bhi aa jao. To ek ek hafte ke liye hamare shahri dost apne bachon ke saath wahan rukne aaye. Humne bahut maze kiye.

Din mein nadi mein nahaye aur raat ko taare dekhe. Office ka kaam bhi kiya aur paharon pe bhi chade. Maze ki baat hai yeh: ke har ek dost ki family jo aayi usne ek baat apne bachon ke baare mein khud se boli. Ke yeh kiske bachey hai? Yahan 7 dinon mein yeh gum gaye hai, humein mile hi nahin. Koi mummy mummy papa papa nahin. Koi tantrum nahin. Koi rona dhona nahin. Koi faaltu ki zid nahin. Yeh kiske bache hai? Tab unhein realize hua khud se, ke bachey to wahin hai.

Bass vaatavaran badla hai. Environment badal gaya hai. Yehi bachey jo ek 2 bedroom flat mein mummy mummy papa papa karte rehte the yahan aake mummy papa ko bhool gaye hai. Kabhi idher baag rahe hai, kabhi udher. Kabhi pedon se kuch tod rahe hai to kabhi pathron ko jor rahe hai. Yahan Palampur ke mitti ke Earth House mein unko apna asli bache ki jhalak dikhi.

Hamare shahar ke ghar sunder hai, TV laga hai, lights lagi hai, yellow, white. Deewarein chamchama rahi hai, floor marble se dhake hai. Kahin koi kona nahin jahn koi bhi suraakh choot gaya ho. Khidkiyaan band hai. Chipkaliyaan bahar hai. Cheeteeinyaan bhi nahin dikhti. Agar merese poocho to yeh plastic ke khilonon se bhare dead houses hai. Kabhi kabhi cochroach aa jaate hai galti se, to unke liye hum pest control waalon ko bula lete hai.

Hamare ghar convinient hai lekin aise ghar mein bachon ko interest karna mushkil hai. Thode mahine pehle maine aur meri wife ne socha ke apni beti ke liye ek bird nest banayein. Shayad koi pakshi aake rahe. Humnein beej khareede, katori mein paani bhara, nest khareeda amazon se, aur apni balcony mein laga diya. Aur phir hum teenon ne intezaar kiya ke koi pakshi aayega. Thode din nikal gaye, humein laga hum kuch galat kar rahe hai.

To humein katore mein bhar ke paani bhi rakh diya. Jab kuch dinon tak kuch nahin hua to maine finally ek mitr jo birds ke saath kaam karte hai unhein phone kiya aur poocha: ke hum kya galat kar rahe hai. Usne ek hi sawaal poocha: aap kaunse floor par rehte ho? Maine bola 24th, chaaubeesvein floor par. To uski aawaaz mein thodi se hasi hai aur bola: phir to aapke ghar kaafi cheel hi aa sakti hai. Kyonki koi bhi aur pakshi itna upar nahin udta.

Hum mein se bahut saare log aise jagah par rehte hai jahan bachon ko khelne jaane ke liye bhi badon ki zaroorat padti hai. Lift lagi hai ghar ke bahar, khelne ki jagah par gaariyaan chalti hai, park ghar se door hai, cycle chalane ki jagah nahin hai. Isliye bache ke saath hamesha kissi ka rehna zaroori ho gaya hai. Ya ma ka, ya baap ka, ya daada dadi, nana naani ka. Varna aaj kall Nanny ka.

Hamare modern gharon mein jismein hum nuclear families ke tarah rehte hai, usmein ek chota bacha khud se kahin jaa nahin sakta, kuch kar nahin sakta. To kar sakta hai to mummy mummy papa papa aur woh woh karta hai. Ab hum sab shaher chor kar paharon mein to nahin jaa sakte. Mera bolne ka yeh maksad bhi nahin hai. Maksad hai to yeh batana ke woh bacha mummy mummy papa papa kyon kar raha hai is umeed mein ke hum us bachey ko samaj payein. Khud pe gussa na ho aur bachon pe gussa na hon.

Mein bhi aise hi ek ghar mein rehta hoon. Mumbai mein. 24th floor pe. Humne apni taraf se choti choti cheezein ki hai ghar mein. Ek swing lagwa liya hai, ek rock climbing wall laga li, bahut saare plants meri wife ne ghar mein rakhe hai. Ghar mein meri beti gandagi kar sakti hai, jab tak woh usko saaf karne mein madad bhi kare. Aur kyonki hamare pass samein hai to hum kaafi baar neechey jaate hai khelne koodne ke liye.

Jab neechey jaate to jo beti karna chahati usko karne dete, uske pace pe, uski raftaar pe duniya ko dekhne ki koshish karte. Kaafi travel karte hai, koshish karte hai ke aise jagah pe rahe jo prakriti mein ho. Nature mein ho. Kuch din pehle mein apne dost ki 4 saal ke beti ko neechey lobby mein ghumane le gaya. Mera paas samaey tha to socha chalo walk karke aate hai. Hawa chal rahi thi to woh neechey jaate hi kuch udte hue patton ke peechey gol gol bhaagney lagi.

Thoda thak gayi to ek car ke bonnet par chad kar let gayi. 2 min leti rahi, kuch nahin bola. Phir ek dum se chilla ke boli: I can see the Sky. I can see the Sky. Meri kamna hai ke hamare bachey kahin bhi rahein, din mein khula aasaamaan kaisa dikhta hai aur raat mein taare kaise dikhte hai, yeh kabhi na bhoolein.

Yeh hum mata, pita, daada, daadi, naana, naani kar sakte hai. Aur kabhi samay lage to Palampur mein jaa ke Earth House mein rahiye.

Apne bina mummy mummy papa papa waale chupe hue bachey ko dekhiye.

Mera naam Harpreet hai. Aapne mere saath apne bachon ke liye paanch min bitaye iske liye mein aapka shukrguzaar hoon.

Phir milenge.

‍