Hear the real story of a kid living in the mountains and learning without a school. What is the one change we can do to make our kids learn anything with joy?
Let’s find out!
Bina school ke padhayi
Aaj se 3 saal pehle meri biwi ne mujhe bola ke tum nikal jao ghar se. Thode din ghoom ke aao. Maine ek company banayi thi 10 saal laga ke, and after we sold it and I had time. To shayad mein ghar ke kaamon mein dakhalandazi kar raha tha to usne bhi sahi bola, ke tum jao. Thode din ghoom ke aao.
Mujhe pahar aachey lagte hai to mein Himachal chala gaya. Wahan pahuncha to mujhe yaad ke mere batchmate hai jo ke yahan kahin aas paas rehte hai. Rajat aur Madhumita. Mein unhein 15 saal se nahin mila tha. To maine call kiya aur poocha. To unhone bole arey ghar aa jao.
Woh log Palampur mein reh rahe the. Jab ghar gaya to pehli baat meri mulakat unke bete Joy se hui. Joy tab I think 3.5 ya 4 saal ka tha.
Ghar mein har jagah dinosaur hi dinosaur the. Deewaron pe cuttings lagi hui thi dinosaurs ki. Joy baith kar ke dinosaurs colour kar raha tha aur phir dinosaurs ko scissors se kaat raha tha. Ek do ghante woh bass yehi karta raha.
Koi aur bacha bhi nahin tha aas paas par woh mummy mummy papa papa nahin laga hua tha. Apne kaam mein magan tha.
Hum 15 saal baad mil rahe the. Maine Rajat aur Madhumita se baat ki to pata laga ke unhone job ki, company chalayi aur last mein woh dono teacher bhi the Rishi Valley school mein. Phir sab kuch chor ke paharon mein rehne aa gaye. Par kyonki teacher the to basic cheezein kya seekhani hai yeh unhein pata tha.
Lekin usse important cheez jo unhein pata thi woh yeh ke bachey ko force karke padai nahin karwa sakte. Uske interest se karwa sakte hai. Joy ka interest by chance dinosaurs mein tha. To dinosaurs ko use karke hi poori padayi chal rahi thi.
Joy dinosaurs ko draw karta tha, phir colour karta tha, phir kaat-ta tha, diwaar pe chipkata tha. Phir papa mummy se dinosaurs ke baare mein aur poochta tha, unke naam likhta tha. Yeh sab chal raha tha.
Joy ne c a t cat likhne se pehle velociraptor and t-rex likhna seekha.
Jab maine Joy se baat ki to usko ek ek dinosaur ke naam pata the. Paani mein rehta hai ke zameen par, kahan paaya jaata tha, sab pata tha. .
Maine usse poocha ke yeh batao dinosaur khata kya hai. To woh confuse sa ho gaya. Mujhe laga shayad sawal samaj mein nahin aaya - phir usne dheere se poocha - herbivore ya carnivore. Matlab vegetarian dinosaur ke baare mein pooch rahe ho ya non veg waale ke baare mein.
Colouring, cutting, drawing, english alphabets yeh sab maa baap ke liye padai thi lekin Joy ke hissab se woh khel tha, padai to bass saath saath mein ho rahi thi.
Us din ke baad hum touch mein rahe, aur kaafi baar mile.
Joy ab 6.5 saal ka ho gaya hai. Abhi bhi school nahin jaata. Actually din mein 5 ghate Table tennis ki ek academy jaata hai. 3 ghante subah and 2 ghanta dupeher mein. Kyonki uska interest hai table tennis mein to Rajat ne ghar par ek table tennis ka table aur gend phenkne waali machine laga di hai.
Aaj subah hi meri unse baat hui. Aur woh bata rahe the ke unhone ek chota system banaya hai ghar mein ke agar koi book padenge to uska summary likhenge. Isliye Joy likh raha hai. Aur agar Ma se poochta hai aur koi improvement hoti hai, to poora page baith ke waapis likh deta hai, bina kissi ke kahe.
Uska cousin brother ki 5th class ke maths sheet hai, Joy ne dekh li to baith ke solve karne laga. Kyonki kissi ka external dabaav nahin hai. Karne ki prerna ander se hai.
Padai abhi bhi full chalu hai. Bass Joy ko abhi bhi nahin lagta ke woh padai hai.
Mere ek dost book publishing industry mein hai. Wahan ke expert maane jaate hai. Woh bata rahe the ke chote bachey kitaabein khud se padna shuru karte hai, lekin 4th 5th class ke baad yeh aadat choot jaati hai. Kabhi kabhi zindagi bhar ke liye. Iska main reason hai kyonki is umar ke baad school ki padai forcefully hone lagti hai.
Subject pasand ho ya na ho. Padna padega.
Isliye bachey jo khushi khushi se padte the woh bhi extra books padna chor dete hai.
Jo Madhumita aur Rajat kar rahe hai woh aasaan nahin hai. Bachon se khel khel mein padai karwana mushkil kaam hai, skilled kaam hai.
Mere liye is sab mein sabse badi learning yeh thi ke padai aur khel mein actually koi difference nahin hai. Yeh difference hum bana dete hai, humare school bana dete hai. Kyonki line mein bitha kar bachon ko dar se padana aasaan hai. Ek class mein kisski ko dinosaur pasand hai, kissi ko billiyaan, kissi ko tiger to teacher bhi kya kare. Aise skilled teacher bhi kam hai.
Lekin as parents hum yeh samaj sakte hai ki forcefully ki hui kissi bhi cheez ka lambey samein mein faayda nahin hai. Aur Khel khel mein bachon ke saath ki hui cheez mein maze bhi hai aur faaydey bhi.
Hamara bachon ko bolna ke khelne nahin jaoge jab tak 2 page nahin likhoge se aaj shayad do page likhein jayein kyonki bachon ko khelna pasand hai.
Lekin bachon ko likhne se thodi nafrat pakka ho jayegi aur lambey samein mein shayad bacha writing karne se katrayega.
Lekin woh 2 page agar aise topic pe ho jismein bachon ko interest ho to shayad woh 2 page woh khud se hi likh dega, kya pata 4 likh de.
Seekne ki jigyasa har bachey mein hoti hai. Lekin usko use kar ke bachon ko padana parents aur teachers ke haath mein hai.
Mera naam Harpreet hai. Aapne mere saath apne bachon ke liye 5 min bitaye iske liye mein aapka shukrguzaar hoon.
Phir milenge.
Join the curious parents' community to receive one researched newsletter every month to understand your child better.
