We usually get irritated and raise voice at our children for their mischief. What can we do differently? Let us look at the mischief from the eyes of the child!
Shaitaan bacche ki jigyasa
Mera naam Harpreet hai. Aur hum agle 5 min hum bachon ke baare mein baat karenge.
Aap kaam kar rahe the aur aapka bacha bhi busy tha. Aapkey bacche ne aapke liye ek drink banayi. Thoda pani liya, usmein namak daala, phir cheeni daali, phir haldi bhi daal di. Phir chamach se ghumaya to paani idher udher bhi gir gaya. Phir woh drink ek glass mein lete aapke pass aaya. Smile kiya aur bola papa yeh piyo. Aapne mana kar diya, lekin bacche ne bola piyo piyo. Aapne ek ghooth piya aur dekha yeh to bahut kadwa hai. Aap kitchen ki taraf bhage normal paani pine ke liye aur dekha wahan haldi, paani, cheeni, namak sabb faila hua hai. Aapka paara poora bad gaya. Aur aap bacche par chila diye.
Aisi ghatna, aisa kuch scenario har ghar mein hota hai. Kabhi kabhi har roz hota hai. Bacche shararti hote hai. Masti karte hai. Galtiyaan karte hai. To humein kya karna chahiye? Aur hamare is samay chilane ka bachon par kya asar hota hai? Chaliey isko samajte hai.
Is poore nazariye ko bachon ki nazar se dekhte hai. Bacche ne dekha aap busy hai. Khelne ke liye koi nahin hai. Ya woh bore ho raha tha. Usne socha kuch naya karte hai. Mummy papa mujhe har roz dhoodh pilate hai, aaj mein bhi kuch bana ke pilata hoon unko. To usne glass aur paani liya. Thoda paani gir gaya, lekin bacche ko uski fikar nahin hai, kyonki woh kuch banane mein magan hai. Sugar sabko aacha lagta hai, namak bhi. Usne dono daal diye paani mein. Shayad usne khhud se usko chakh karke bhi dekha. Pehli baar usne samjha ke cheeni aur namak dono paani mein milane pe kya hota hai. Woh ghulte hai kya? Kitni cheeni ghul jaati hai, kitni reh jaati hai. Arey namak to gayab hi ho gaya jaldi, yeh sab usne khud se seekha. Tabhi uski nazar haldi ke colour par padi. Usko laga arey yeh milaoonga to koi aachey rang ki drink ban jayegi. Usne shayad zindagi mein kabhi bhi haldi nahin chakhi hai. Aaj pehli baar chutki ya poora chamach le ke daal diya. Aur dekha ke kaise ghul raha hai, kaise chamach se ghumane se haldi ke daane bhi ghoom rahe hai. Shayad waapis taste kiya aur apni jeebh bahar nikali kyonki yeh to peene layak hi nahin hai. Ab usko duniya mein apne sabse payare logon ki yaad aayi, uske mata pita. Aur usne socha ke chalo unko pilata hoon, khoob maza aayega, masti aayegi.
Aur aasha se, sab jo kachra kiya tha kitchen mein, woh bhool ke woh apne sabse priyey logon ke paas aaya. Aage kya hua yeh to aapko pata hi hai. Agar humein use daanta, gussa kiya to kya galat kiya? Bachpan mein bachon ke pass hota hi kya hai. Curiosity matlab jigyasa hi to hoti hai. Yeh jigayasa hi hai jisne maaanav ko yahan tak pahuchaya hai.
Jigyasa se hi aavishkaar hote hai, duniya aage badti hai. Jiske paas jigyasa hai, uske koi din khali nahin jaata, woh hamesha seekhna chahata hai. Aage badna chahta hai.
Aur gussa kar ke humne us jigyasa parr thanda paani daal diya. Bacha seekha ke jigayasa se zyada mahatavpooran hai saaf ghar. Mein kone mein baitha rahoon woh theek hai lekin ghar ganda nahin hona chahiye. Hamare school bhi kaafi time yehi karte hai. Sawaal poochne ke yogyata ko dabate hai. Humne ghar parr bhi daba di. Aapke dimaag mein jo sawaal chal raha hai woh sahi hai. Ke iska kya matlab hai. Ghar kitna bhi ganda karnein de. Jo chahe woh karne de. Bilkul nahin. To phir kya karein?
Is paristhiti mein hum bahut hi simple kaam kar sakte hai. Hum bachey ko bol sakte hai, arey aacha hai tumne experiment kiya. Agli baar kuch different drink laana, yeh to mujhe aachi nahin lagi. Lekin yeh dekho kitna kuch idher udher gira hua hai. Chalo isko ikathe mil kar saaf kar dete hai. Yeh karwana zaroori hai.
Bacha ab samaj gaya ke mere mata pita ko meri jigyasa mein ruchi hai. Mein try karta rahoonga. Lekin ghar saaf hona bhi zaroori hai varna safai mujhe hi karni padegi. Isliye ab agli baar baccha banate hua paani thoda kam girayega. Dhayaan thoda zyada rakhega. uske haath bhi chote se hai, mann bhi chanchal hai, to jitna rakh paata aaj, usse zyada rakhega kyonki aapne do cheezein ki - usko uski jigyasa pe encouragement diya aur ghar ko saaf rakhne waale niyam ka bhi palan kiya.
Yeh sabb hum har situation mein kar sakte hai. Humein bass cheezon ko thoda bachon ke nazar se dekhna hai. Aur jitna hum apne bachey ko zyada samjhege, utna hum yeh har roz kar paayenge. Aur hamara blood pressure bhi kam rahega aur hamara sambandh bhi bachey ke saath gehra hoga.
Mera naam Harpreet hai. Aapne mere saath apne bachon ke liye paanch min bitaye iske liye mein aapka shukrguzaar hoon. Phir milenge.
Join the curious parents' community to receive one researched newsletter every month to understand your child better.
