Padhna, likhna aur badon ka aadar

Aap ek curious parent hai. Aur agle paanch minute hum bachon ke baare mein baat karenge.

Beta namaste bolo. Yeh aaj se 2-3 saal pehle tak mein apni beti ko bolta tha.

Aaj kall kissi ke ghar jaate hai to maa baap bacche ko bolte hai. Harpreet Uncle aaye hai. Namaste bolo. Badon ka aadar karna hamari sanskriti mein hai. Ab aap poochenge ke Padne likhne aur badon ki izzat karne ka kaise lena dena hai? Koi mehmaan ghar pe aaya to padne likhne ka usko namaste bolne se kya lena dena hai? Chaliye dekhte hai ke padna yaani reading hota kya hai.

Mein kuch dinon pehle ek 7th class ki ladki se mila jo ki govt school mein jaati thi. Maine poocha ke aapne aaj kall mein apni kitaab se kya pada. To boli maine evaporation pada. Maine poocha to batao evaporation kya hota hai? To usko evaporation ke definition poori pata thi. Usne ekdum se suna di. Sab words theek se bole, koi galti nahin. Lekin jab maine poocha ke evaporation hota kya hai, matlab ho kya raha hai, to woh meri taraf dekhne lagi. Aur waapis definition repeat kar di. To mujhe samaj mein aaya ke usko actually evaporation hota kya hai pata nahin hai. Usne bass ratta maar liya hai. Pronunciation sahi hai ekdum.

Aur agar aap ‘reading’ ka test loge to woh aati hai. Dikh raha hai ke padd rahi hai. Lekin samaj mein kuch nahin aa raha. To reading hoti kya hai? Reading aane ka matlab to yeh hua ke maine jo pada usko mein dimaag mein soch paaon. Samaj paaoon. Store kar paaon sahi jagah pe taaki tabhi zindagi mein zaroorat pade to dimaag ke ander mil jaye.

Evaporation pada to samaj mein aana chahiye ke hamare kapre ghar mein evaporation ke karan sookhte hai. Ice cube jo melt ho rahi hai, woh evaporation ho raha hai. Yeh reading ka asli matlab hai. Akshar padna nahin par cheezeon ko samajna.

To chaliye dekhte hai ke writing ka kya matlab hai? Hum chahahte hai ke bacche aachi writing mein likhein. sundar akshar. Unki spelling mistake dekhte hi pakad lete hai. Bacche ko writing practise karne ki liye bitha dete hai. Chalo aaj ek hi like 10 baar likho taaki writing theek ho jaye. But kya isko likhna bolte hai?

Kya aachey novel, poetry, linkedin, twitter post aise likhe jaate hai? Ek line ko 10 baar likh ke? Likhna safai se likhe hue shabdon ke baare mein nahin hai. Na hi likhna sahi spelling ke baare mein hai. Aachi lakhai isse bahut kuch zyada hai. Agar kissi bacche ko humnein bola ke apni vacation ke baare mein likho to woh karne ke liye pehle bache ko yaad karna hai. Apni memory se information laani hai. Phir usko sochna hai ke mujhe kaisa laga, maine kya dekha, jo dekha unke kya naam the, jagahon ke naam kya the. Phir bacche ko yeh sab ek order mein daalna hai aur phir pencil ko paper par lagana hai. Is process ko jismein ek bacha soch paye aur apni soch ko ek roop de paye use likhna kehte hai. Yeh sab bacche ke ander chal raha hia. Humein nahin dikhta. Kyonki humein handwriting aur spelling mistake dikhti hai to kaafi baar hum usko hi likhna samaj lete hai. Hum aisa karte hai kyonki shayad humein bhi aise hi bada kiya gaya hai. To hamari bhi aadat ban gayi hai aur is aadat ko badalna mushkil hai. Aaadta ban gayi hai ke bacche ke ander kya ho raha hai, jo dikhta nahin hai, usko bhool jaate hai, aur bahar waale ko theek karne mein lag jaate hai.

Aur yeh khali likhai padai pe khatam nahin hota. Hamari yehi aadtein beech mein aa jaati hai jab hum bachon ko values seekhna chahate hai, maanaytaein seekhna chahate hai. Jaise badon ka aadar. Agar daada daadi aaye hai to hum bolte hai ke beta pair chuo. Pairon ko haath lagao. Koi ghar aaye to bolte hia, beta namaste bolo. Koi jaa raha ho to bye bolo. Agar hamara bacha nahin bolta to humein thodi sharam aati hai. Thode use aur bolte hai, beta bolo. Nahin bolta to bacche par label laga dete hai: thoda sharmila hai. Ya mehmaan jaane ke baad bolte hai: arey tum bye nahin bol sakte. Yeh kyon hai? Kyonki hum bhi aise hi bade hue hai.

Samaaj mein yeh karna aacha mana jaata hai. Respectful hai. But kya humein yeh chahiye? Ya phir se jaise reading and writing to samajne mein thodi gadbad hai waise hum bacche ko khali bahar se dekh rahe hai aur ander ka bacha bhool gaye hai. Kyonki Aadar aur Sneh mein bahut fark hai. Respect is not affection. Bachon mein daada daadi ke prati sneh ho, unhe dekh ke bacche ka man kare unhe gale se lagane ke liye, Khud se jaa ke unke pass baithe, unke saath thoda khele, yeh khali sneh se aa sakta hai.

Kyonki bulwa ke Aadar karwane se to khali bahar ka shareer jhuk raha hai. Dikhava kar raha hai. Is dikhave ko baar baar karne se sneh aana munkin nahin hai. . Samasya yeh hai ke jis raaste par hum chal rahe hai, uspe chalte rahenge to humein woh mil jayega jo humein chahiye. Ek aisa bacha jo padta hai lekin samajta nahin hai, jo likhta hai lekin khud ko express nahin kar pata, jo aadar karta hai par sneh nahin hai. Mein bhi kuch saal pehle tak isse raste par tha.

Bachon ki bahar ki cheezon ko dekh raha tha. Aur ander kya ho raha hai woh nahin dekh paa raha tha. Agar humein yeh nahin chahiye to humein khud ko thoda badalna hoga. Aankhein band karke apne bacche ko dekhna hoga. Apne mann ki aakhon se bacche ke ander kya ho raha hai, usko dekhna hoga. Taaki hum tai kar sakein ke humein kaisa bacha chahiye.

Mera naam Harpreet hai. Aapne mere saath apne bachon ke liye 5 min bitaye iske liye mein aapka shukrguzaar hoon. Agar aapko is episode mein kahi hui baat sahi lagi ho to isse aage share kijiye.

‍