Galtiyon ka sudhaar
Mera naam Harpreet hai. Aur hum agle 5 min bachon ke baare mein baat karenge.
Galtiyon ki baat aayi to mujhe google maps ki yaad aagayi. Kabhi aapne notice kiya ho ke kaise google maps kabhi aap pe chillata nahin hai, ya ninda nahin karta. Kabhi nahin kehta arey bewakoof, daayein jaana tha peechye se.
Ab tumhein lamba rasta lena padega. Aur time bhi zyada lagega. Theek se suna karo, jo mein bata rahi hoti hoon.
Agar google maps aisa karta to mein to istemaal karna pakka chor deta. To agar daayein jaana choot jaye to google map bass khali manzil tak pahunchne ka naya rasta aapko dikha deta hai, bina kuch sunaye. Google Maps ne to samaj liya hai ke uska maksad humko kharaab lagwana nahin hai, uska maksad hai hamari madad karna, hamari manzil tak pahunchene mein.
To ab bachon pe aayein to 'Agar galti ho jaye to hamara maksad kya hai? Usko daant kar niraaash karna nahin. Hamara maksad hai bachey ki madad karna. Taaki woh behtar bane. Bahut galtiyaan khud se hi theek ho jaati hai. Ek bacha jab chalna seekhta hai to pehle dagmagata rehta hai. Tab hum uski galtiyaan nahin nikalte.
Kyonki humein vishwas hai ke woh khud se chalna seekh jayega. Hum usko sahara dete hai, support dete hai. Taaki woh behtar bane. Taaki woh aur jaldi chalna seekhe. Hum bachey ko nahin bolte - arey yeh kya tumhein chalna nahin aata, baith jao, ruko mein dikhaata hoon kaise karte hai? Hum usko chalte dete hai, girne dete hai.
Uska aatm vishwaas badne dete hai. Usko sahara dete hai. Uski aur mustarate hai. To bacha aur mehnat karta hai, aur chalte ki koshish karta hai. Aur chalna seekh jaata hai. Ab bacha thoda bada ho gaya hai aur maths mein galti kar raha hai. Ab yahan pe maata pita zara gusse hone lagte hai. Ya kehne lagte hai arey tumhein itni se cheez samaj mein nahin aati? Ruko mein batata hoon. Yahan pe humein sochna hai.
Ke jo raviya humne apnaya tha jab bacha chalna seekh raha tha, kya hum wohi raviya, wohi dhairya yahan bhi rakh sakte hai? Yeh zindagi ka sach hai ke 'sab galtiyaan karte hai'. To agar sab galtiyaan karte hi hai to phir galtiyon ki taraf humein dosti ki bhaavna aani chahiye. Kyonki galtiyaan to hamari zindagi bhar ki saathi hai. Yeh to hoti rahengi. Galtiyan hone ka ek udheshaya hai, ek reason hai. Humko sikhana.
To unse pyaar se hi nipat liya jaye to behtar hai. Khud ki galtiyaan pakadna aur sudhaarna ek zaroore kaushal hai jo ke har bachey mein hota hai. Bacha khud se chalna seekhta hai, khud se bolna seekhta hai. Lekin hamare school kuch is tarah ke hai ke teacher ka main kaam hai galtiyaan pakadna. Isliye bachey khud se galtiyaan sudhaarne ka kaushal dheere dheere kho baithete hai.
Kyonki galtiyaan ki to teacher pakad hi legi. Lekin hum ghar par galtiyaan pakadne aur sudharne waale kaushal ko zinda rakh sakte hai. Is kaushal se bachon mein bahut aatm vishwaas aata hai. Ke mein khud kar sakta hoon. Galtiyaan humein apne bachon se door karti hai, lekin pyaar se kiya hua galtiyon ka sudhaar humein bachon ke aur kareeb laa sakta hai. Bache ke mann mein yeh nahin jaana chahiye - ke mujhe koi galtiyaan nahin karni jeevan mein. Ya galti ho gayi to kya hoga.
Yeh hona chahiye ke 'Itna mujhe aata hai, mein kar sakta hoon. Mein galtiyaan kar ke unko theek karne ki sharamta bhi rakhta hoon. Isliye mein kuch bhi seekh sakta hoon'. Kuch bhi kar sakta hoon. Kuch bhi bann sakta hoon.
Mera naam Harpreet hai. Aapne mere saath apne bachon ke liye paanch min bitaye iske liye mein aapka shukrguzaar hoon.
Phir milenge.
